İsrailin Baş naziri Benyamin Netanyahu Nyu-Yorkda Birləşmiş Millətlər Təşkilatının Baş Assambleyasının 81-ci sessiyası zamanı dünya liderlərinə müraciət edib.

Gundemxeber.org xəbər verir ki, Netanyahu kürsüyə qalxarkən Baş Assambleya zalında diqqətəlayiq anlar yaşanıb.

Netanyahu çıxış etmək üçün kürsüyə yaxınlaşarkən, çoxsaylı ölkələrin nümayəndə heyətləri etiraz əlaməti olaraq zalı tərk ediblər. Zalda istehza və etirazlar əks-səda verərkən, Netanyahunun tərəfdarlarının alqışları və şüarları da eşidilib. Sessiyaya sədrlik edən BMT Baş Assambleyasının prezidenti dəfələrlə asayişin bərpa olunmasına çağırıb. Həmçinin bildirilib ki, Fələstinin BMT-dəki Daimi Nümayəndəliyi çıxışdan əvvəl üzv dövlətlərə mesajlar göndərərək Netanyahu kürsüyə çıxdıqda onları kütləvi şəkildə zaldan çıxmağa çağırıb.

Çıxışının lap əvvəlində Netanyahu zalı tərk edən ölkə nümayəndələrini hədəfə alıb. İsrail Baş naziri nümayəndə heyətlərini "mənəvi qorxaqlar" adlandırıb və getmək istəyən digər nümayəndələrə də  zalı tərk etməyi tapşırıb. "Associated Press"in məlumatına görə, etirazdan sonra Baş Assambleya zalındakı bir çox yer boş qalıb.

Netanyahunun çıxışında ən diqqət çəkən məqamlardan biri onun kürsüdə peycer cihazını göstərməsi olub. İsrailin HƏMAS, Hizbullah və İrana qarşı hərbi əməliyyatlarından danışan Netanyahu cihazı qaldıraraq "Peycerləri xatırlayırsınız? Hizbullah, şübhəsiz ki, xatırlayır", - deyib. 

Netanyahunun açıqlamaları, Hizbullah üzvlərinin istifadə etdiyi peycerlərin eyni vaxtda partladılması ilə bağlı 2024-cü ilin sentyabr ayında Livanda keçirilən əməliyyatı yenidən diqqət mərkəzinə gətirib. 

17 sentyabr 2024-cü ildə Livanda Hizbullah üzvləri tərəfindən istifadə edilən minlərlə peycer eyni vaxtda partlayıb. İlk gün baş verən partlayışlar nəticəsində iki uşaq da daxil olmaqla 12 nəfər həlak oldu, təxminən 2800 nəfər yaralanıb. 

"İranın nüvə bombası yaratmaq planı yoxdur".

Gundemxeber.org xəbər verir ki, bunu "Fox News"a müsahibəsində İran prezidenti Məsud Pezeşkian deyib. 

"Biz heç vaxt nüvə silahı əldə etməyə çalışmamışıq. Nüvə Silahlarının Yayılmaması Müqaviləsinə (NPT – red. ) riayət etmək istəyirik", - deyə prezident bildirib.

Sentyabrın 19-da İranın Ali Milli Təhlükəsizlik Şurasının katibi Möhsün Rzayi ölkəsinin Əli Xameneinin nüvə silahının hazırlanmasını qadağan edən fətvasına əməl etməyə davam etdiyini və hələlik NPT-dən çıxmaq qərarına gəlmədiyini bildirib. O hesab edir ki, ABŞ və İsrailin hərəkətləri Tehranın NPT-dən çıxması üçün əsas yarada bilər.

Elə həmin gün Rezai həmçinin İran hakimiyyətinin Qətər vasitəçiləri vasitəsilə ABŞ ilə münaqişəyə son qoymaq üçün şərtlərini çatdırdığını və Prezident Donald Trampdan cavab gözlədiyini açıqlayıb. O, bu şərtlərə bütün cəbhələrdə hərbi əməliyyatların dayandırılması, dondurulmuş aktivlərin azad edilməsi və dəniz blokadasının qaldırılmasının daxil olduğunu bildirib. 

ABŞ prezidenti Donald Tramp Çin prezidenti Si Cinpini 2015-ci ildən bəri Vaşinqtona ilk dövlət səfəri çərçivəsində Ağ Evdə qırmızı xalçada qarşılayıb. Qala şam yeməyindən əvvəl amerikalı siyasətçi həmkarına xüsusi heykəl hədiyyə edib. 

Gundemxeber.org "The New York Post" qəzetinə istinadən xəbər verir ki, Ağ Ev rəhbəri çinli həmkarına ABŞ-nin milli simvolu olan keçəl qartal heykəlini hədiyyə edib.

Keçəl qartal 1782-ci ildən bəri ABŞ-nin əsas milli simvoludur. Həmin vaxtdan bəri onun təsviri Kontinental Konqres tərəfindən ölkənin Böyük Möhürü üçün təsdiq edilmişdir.

Tramp hədiyyəni təqdim edərkən "Keçəl qartal ABŞ-nin milli simvolu və Amerikanın azad ruhunun təcəssümüdür. Ümid edirik ki, o, Pekində yaxşı bir yuva, gözəl bir ev tapacaq", - deyib. 

Kaliforniyanın Hespiria şəhərində yüngül mühərrikli təyyarə qəzaya uğrayıb.

Gundemxeber.org xəbər verir ki, nəticədə 2 nəfər həlak olub. 

Federal Aviasiya Administrasiyası və Milli Nəqliyyat Təhlükəsizliyi Şurası qəzanın səbəblərini araşdırır.

"Paris artıq Kiyevə maliyyə yardımı göstərəcək gücdə deyil". 

Gundemxeber.org xəbər verir ki, Fransa prezidentliyinə namizəd və Milli Birlik parlament fraksiyasının rəhbəri Marin Le Pen bunu "Politico" qəzetinin təşkil etdiyi tədbirdə çıxışı zamanı deyib.

"Artıq Ukraynaya maliyyə yardımı göstərə bilmərik. Bunun üçün vəsaitimiz yoxdur", - deyə siyasətçi bildirib.

O qeyd edib ki, Fransa hazırda maliyyə böhranı yaşayır. Le Penin sözlərinə görə, bu fakt heç kimə sirr deyil.

“TikTok” Böyük Britaniya İnformasiya Komissarlığı Ofisinin (ICO) 2023-cü ildə tətbiq etdiyi 12,7 milyon funt-sterlinq (16,8 milyon dollar) cərimə ilə bağlı apellyasiya şikayətini geri götürüb.

Gundemxeber.org xəbər verir ki, cərimə 13 yaşdan kiçik uşaqların şəxsi məlumatlarının mühafizəsi qaydalarının pozulmasına görə tətbiq edilib.

ICO-nun məlumatına görə, “TikTok”un qaydaları bu yaş qrupunda olan uşaqların platformadan istifadəsini qadağan etsə də, 2020-ci ildə Böyük Britaniyada təxminən 13 yaşdan kiçik 1,75 milyon uşaq “TikTok”dan istifadə edib.

Böyük Britaniya qanunvericiliyinə əsasən, 13 yaşdan kiçik uşaqlara onlayn xidmət göstərən şirkətlər valideyn və ya qəyyum razılığı almalıdır.

“TikTok” Çin texnologiya şirkəti” ByteDance”yə məxsusdur.

Pakistan təhlükəsizlik qüvvələri cənub-qərbdəki Bəlucistan əyalətində 19 terrorçunu zərərsizləşdirib.

Gundemxeber.org xarici mətbuata istinadən xəbər verir ki, Kvetta və Keç rayonlarında Fitna əl-Xaverij  və Fitna əl-Hindustana qarşı antiterror əməliyyatları keçirilib. Bir Pakistan əsgəri yaraqlılarla toqquşmada həlak olub.

Bu, Pakistan və Hindistan arasında gərginliyin artması fonunda baş verib. 

Ermənistanın Baş naziri Nikol Paşinyan Nyu-Yorkda Avropa Komissiyasının Prezidenti Ursula fon der Lyayen ilə görüşüb.

Gundemxeber.org xəbər verir ki, tərəflər Ermənistan-Aİ əməkdaşlıq gündəliyinə dair məsələləri müzakirə ediblər.

Baş nazir Aİ-nin Ermənistanın iqtisadi şaxələndirmə prosesinə və bu məqsədlə qəbul edilmiş qərarlara göstərdiyi dəstəyin əhəmiyyətini vurğulayıb. 

Ursula fon der Lyayen bildirib ki, Aİ Ermənistan hökumətinin proqramlarının irəlilədilməsini və müxtəlif sahələrdə əməkdaşlığın inkişafını dəstəkləməyə davam edəcək.

Tərəflər həmçinin regional əhəmiyyətli məsələlərə də toxunublar.

Sosial şəbəkələrdə İran Prezidenti Məsud Pezeşkianın BMT Baş Assambleyasındakı çıxışı zamanı bir sıra ölkələrin nümayəndələrinin, o cümlədən Azərbaycan nümayəndə heyətinin iclas zalında olmamasına dair məlumat yayılıb.

Gundemxeber.org APA-ya istinadən xəbər verir ki, Məsud Pezeşkianın ötən gün BMT-də çıxışı zamanı Azərbaycan nümayəndə heyəti zalda olub.

İran Prezidentinin çıxışı zamanı guya Azərbaycan nümayəndə heyətinin zalda olmamasına dair səslənən iddialar dezinformasiya və feykdir.

Açıq mənbələrdə yayılan məlumatlara görə, Pezeşkianın 23 sentyabr tarixində BMT Baş Assambleyasındakı çıxışı zamanı zalı tərk edən tərəf ABŞ nümayəndəsi olub. İsrail nümayəndə heyətinin isə İran Prezidentinin çıxışında iştirak etmədiyi bildirilib.

Azərbaycanın nümayəndə heyətinin zalı tərk etməsi barədə məlumat həqiqəti əks etdirmir.

İsrail hərbçiləri hələlik Suriyanın cənubundakı bufer zonadan çıxmağı planlaşdırmır.

Gundemxeber.org The Times of Israel"ə istinadən xəbər verir ki, bunu İsrailin müdafiə naziri İsrael Kats bildirib.

Katsın sözlərinə görə, İsrail sərhəddə və ölkə vətəndaşları üçün cihadçı təhlükəsi qalmaqda davam etdiyi müddətdə Hermon dağında və təhlükəsizlik zonasında hərbi mövcudluğunu qoruyub saxlayacaq.

Nazir İsrailin nəzarətində olan Qolan yüksəkliklərinin "İsrailin ayrılmaz hissəsi" olduğunu bildirib.

Kats həmçinin xəbərdarlıq edib ki, Suriyadan İsrail ərazisinə zərbələr endiriləcəyi təqdirdə, İsrailin bu dəfə nəzarətə götürəcəyi istənilən ərazi hərbi qanunlara əsasən "əbədi olaraq İsrailin nəzarətində qalacaq".

Bundan əvvəl Suriya Prezidenti Əhməd Əhməd Əl Şaraa Dəməşqin Qolan yüksəkliklərinə dair iddialarından imtina etməyəcəyini bildirib.