Azərbaycan xarici işlər naziri Ceyhun Bayramov ermənistanlı həmkarı Ararat Mirzoyanla Birləşmiş Millətlər Təşkilatının Baş Assambleyası çərçivəsində sentyabrın 24-də Nyu-Yorkda görüş keçirib.

Gundemxeber.org xəbər verir ki, bu barədə Azərbaycanın Xarici İşlər Nazirliyi (XİN) məlumat yayıb.

Qeyd olunub ki, hər iki nazir Azərbaycan və Ermənistan arasında sülhün əhəmiyyətini vurğulayaraq 2025-ci il Vaşinqton Sülh Sammiti çərçivəsində nail olunmuş razılaşmalardan sonra əldə edilmiş irəliləyişi nəzərdən keçirib.

Bildirilib ki, görüşdə Azərbaycan və Ermənistan arasında iqtisadi və nəqliyyat infrastrukturunun açılmasına xüsusi diqqət yönəlib. Bu kontekstdə sülhün faydalarının praktiki nümunələri kimi Azərbaycan və Ermənistan arasında ticarət və tranzit əlaqələri vurğulanıb.

Nazirlər müxtəlif çoxtərəfli platformalarda müsbət gündəliyin təşviq edilməsi imkanları barədə fikir mübadiləsi aparıblar.

Nazirlər birbaşa dialoqu davam etdirmək barədə razılığa gəliblər.

Ermənistan Respublikasının xarici işlər naziri Ararat Mirzoyan ABŞ hökuməti tərəfindən təşkil olunmuş "Sülh yolu ilə rifah: Transxəzər ticarət marşrutu və TRIPP-ə investisiyalar" adlı tədbirdə iştirak edib.

Gundemxeber.org xəbər verir ki, Mirzoyan Azərbaycanın xarici işlər naziri Ceyhun Bayramov və ABŞ Dövlət katibinin Avropa və Avrasiya məsələləri üzrə köməkçisinin müavini Brendan Hanrahan ilə birlikdə "Sülh perspektivləri: TRIPP və Transxəzər marşrutunun həyata keçirilməsi" mövzusunda panel müzakirəsində çıxış edib.

Tədbirdə ABŞ-nin sülh missiyaları üzrə xüsusi nümayəndəsi Stiv Vitkof da iştirak edib.

Müzakirələr zamanı sülh və regional əlaqəlilik gündəliyi, eləcə də 8 avqust 2025-ci il tarixindən bəri əldə edilmiş mühüm nailiyyətlər nəzərdən keçirilib. Mirzoyan öz çıxışında ABŞ-nin həlledici iştirakı ilə keçirilmiş 8 avqust sülh sammitinin Ermənistan və Azərbaycan arasında sülhün bərqərar olması və regionda kommunikasiyaların açılması baxımından tarixi əhəmiyyətini vurğulayıb. O, sülhün təmin edilməsi nəticəsində vətəndaşlar üçün yaranan real dəyişiklikləri, həmçinin sülhün bərqərar olmasından sonra Ermənistan-Azərbaycan münasibətlərindəki müsbət irəliləyişləri qeyd edib.

Nazir Transxəzər Müəssisə Fondunun region ölkələri və regionlararası əlaqəliliyin səmərəli inkişafı üçün həlledici əhəmiyyət daşıdığını vurğulayıb. O, həmçinin Ermənistan-ABŞ strateji tərəfdaşlığının inkişafında əldə edilmiş real və konkret uğurları məmnunluqla qeyd edib.

Tədbirdə həmçinin Transxəzər Müəssisə Fondu çərçivəsində maliyyə investisiyası imkanları müzakirə olunub. Müzakirələrdə Gürcüstan, Mərkəzi Asiya ölkələri və özəl sektorun nümayəndələri iştirak ediblər.

Azərbaycan Respublikasının Prezidenti İlham Əliyev sentyabrın 24-də Çinin "01.AI" və "Sinovation Ventures" şirkətlərinin baş icraçı direktoru Kei-Fu Lini, İtaliyanın "TEHA Group" şirkətinin Beynəlxalq sammitlər üzrə kordinatoru və Səudiyyə Ərəbistanı üzrə inkişaf rəhbəri Filippo Malinvernonu qəbul edib.

Gundemxeber.org xəbər verir ki, qonaqlar qəbula görə dövlətimizin başçısına minnətdarlıqlarını bildirdilər.

Onlar Prezident İlham Əliyevin himayəsi altında Bakıda keçiriləcək İkinci Azərbaycan Beynəlxalq İnvestisiya Forumunda iştirak edəcəklərini dedilər və bu tədbirin əhəmiyyətinə toxundular.

Prezident İlham Əliyev ölkəmizin həm Çin, həm də İtaliya ilə sıx münasibətlərinin olduğunu vurğuladı, hər iki ölkədən olan iş adamlarının Azərbaycana sərmayə yatırdıqlarını bildirdi.

Söhbət zamanı "Azərbaycan Respublikasının 2025–2028-ci illər üçün süni intellekt Strategiyası"nın təsdiq edildiyi xatırlandı, ölkəmizdə mövcud əlverişli biznes mühitinə toxunuldu, yerli sahibkarlarla yanaşı, xarici investorlar üçün yaradılmış münbit şəraitdən bəhs olundu.

Görüşdə yaşıl enerji, kibertəhlükəsizlik, təhsil və digər sahələrdə süni intellektin praktiki tətbiqi ilə bağlı fikir mübadiləsi aparıldı, ölkəmizlə bu şirkətlər arasında əməkdaşlıq imkanları müzakirə edildi.

BMT Baş Assambleyasının 81-ci sessiyası çərçivəsində xarici işlər naziri Ceyhun Bayramov Dominikan Respublikasının xarici işlər naziri İto Bisono ilə görüşüb.

Gundemxeber.org xəbər verir ki, nazirlər münasibətlərinin inkişaf perspektivlərini müzakirə edib və iki ölkənin xarici işlər nazirlikləri arasında siyasi dialoqun institusionallaşmasının vacibliyini vurğulayıblar.

Tərəflər, həmçinin qarşılıqlı maraq doğuran ikitərəfli və çoxtərəfli məsələlər ətrafında fikir mübadiləsi aparıb, beynəlxalq təşkilatlar çərçivəsində əlaqələndirmənin gücləndirilməsi perspektivlərini qeyd ediblər.

Görüşdən sonra nazirlər “Azərbaycan Respublikası Hökuməti ilə Dominikan Respublikası Hökuməti arasında adi pasport sahibləri üçün viza tələbindən qarşılıqlı azad etmə haqqında Saziş”i imzalayıblar.

Bundan əlavə, tərəflər “Azərbaycan Respublikasının Xarici İşlər Nazirliyi ilə Dominikan Respublikasının Xarici Əlaqələr Nazirliyi arasında siyasi məsləhətləşmələr mexanizminin yaradılması haqqında Anlaşma Memorandumu”nu imzalayıblar. Bu yeni sazişlər institutsional çərçivənin genişləndirilməsinə və ikitərəfli əlaqələrin daha da möhkəmlənməsinə əhəmiyyətli töhfə verəcək.

Azərbaycan, Türkiyə və Özbəkistan hərbi qulluqçularının iştirakı ilə ölkəmizdə keçirilən “Birliyin Gücü - 2026" birgə hərbi təliminin komanda-qərargah məşqləri keçirilib. 

Gundemxeber.org xəbər verir ki, iştirak edən bölmələrin qərargah fəaliyyətinin, o cümlədən komandirlərin qərarqəbuletmə və bölmələri idarəetmə bacarıqlarının təkmilləşdirilməsi məqsədilə keçirilən məşqlərdə qərargahların müəyyən edilmiş ərazilərdə açılaraq yerləşdirilməsi, maskalanması və fəaliyyətlərinin təşkili üzrə tədbirlər həyata keçirilib. 

Təlimdə icra olunacaq epizodlara uyğun olaraq Xocavənd rayonunda yerləşən "Qızılqaya", Naxçıvan Muxtar Respublikasında yerləşən "Qarabağlar" Təlim mərkəzlərində, eləcə də Xəzər dənizinin ölkəmizə aid akvatoriyasında yerləşən "Böyük Zirə" təlim sahəsində komandirlər tərəfindən yaranmış vəziyyətin qiymətləndirilməsi, təhlili və qərarların qəbul edilməsi üzrə tapşırıqlar yerinə yetirilib.

Məşqlərdə əsas diqqət iştirakçı ölkələrin hərbi qulluqçuları tərəfindən tapşırıqların birgə icrası zamanı qarşılıqlı uzlaşmanın effektivliyinin artırılmasına yönəldilib.

BMT Baş Assambleyasının 81-ci sessiyası çərçivəsində Azərbaycanın xarici işlər naziri Ceyhun Bayramov Beynəlxalq Qızıl Xaç Komitəsinin (BQXK) prezidenti Mirjana Spoljariclə görüşüb.

Gundemxeber.org xəbər verir ki, bu barədə XİN-in “X” hesabında bildirilib.

Görüşdə Azərbaycan ilə BQXK arasında əməkdaşlığın hazırkı vəziyyəti və perspektivləri müzakirə olunub.

Tərəflər Azərbaycan-Ermənistan sülh prosesinin hazırkı vəziyyəti, keçmiş münaqişənin nəticələrinin aradan qaldırılması istiqamətində görülən işlər və itkin şəxslərin taleyinin müəyyənləşdirilməsinin zəruriliyi barədə fikir mübadiləsi aparıblar.

Azərbaycan beynəlxalq humanitar hüquqa və humanitar prinsiplərə sadiqliyini bir daha təsdiqləyib.

Görüşdə BQXK ilə qarşılıqlı maraqlar əsasında dialoqun davam etdirilməsinin vacibliyi də vurğulanıb.

Qarşılıqlı vizasız rejim Azərbaycan və Çin arasında humanitar mübadilələrin daha da intensivləşməsinə şərait yaradır.

Gundemxeber.org xəbər verir ki, bunu Çinin Azərbaycandakı səfiri Lu Mey Çin Xalq Respublikasının yaradılmasının 77-ci ildönümünə həsr olunmuş qəbulda deyib.

Səfir bildirib ki, Azərbaycan gəncləri arasında Çin mədəniyyətini və dilini öyrənməyə böyük maraq müşahidə olunur: “Bu gün biz Azərbaycandakı Konfutsi institutlarının tələbələrini gözəl Çin mədəniyyətinə dair çıxışları və tədbirləri təqdim etməyə dəvət etmişik”.

Diplomat Çin və Azərbaycanın Birləşmiş Millətlər Təşkilatı, Şanxay Əməkdaşlıq Təşkilatı və qarşıdan gələn Asiyada Qarşılıqlı Fəaliyyət və Etimad Tədbirləri üzrə Müşavirənin Sammiti daxil olmaqla, çoxtərəfli platformalarda sıx qarşılıqlı fəaliyyət və əlaqələndirmə həyata keçirdiyini qeyd edib.

“Biz həmişə Qlobal Cənubun ümumi maraqlarını birgə müdafiə edir, beynəlxalq ədalətin və hüququn aliliyinin qorunmasının keşiyində qətiyyətlə dayanırıq”, - deyə səfir vurğulayıb.

Lu Mey gələcəkdə Çin-Azərbaycan hərtərəfli strateji tərəfdaşlığının inkişafı üçün böyük potensialın olduğunu bildirib.

“Çin ölkələrimizə və xalqlarımıza daha çox bəhrə vermək üçün iki dövlət başçısının əldə etdikləri mühüm razılaşmaların tam şəkildə həyata keçirilməsi istiqamətində Azərbaycanla səylərini birləşdirməyə hazırdır”, - deyə diplomat əlavə edib.

Xarici işlər naziri Ceyhun Bayramov ABŞ Prezidenti Donald Trampın təşkil etdiyi qəbulda iştirak edib.

Gundemxeber.org xəbər verir ki, bu barədə Xarici İşlər Nazirliyinin “X” hesabında məlumat verilib.

Qəbul 8 avqustda Vaşinqtonda keçirilən sammit və Strateji Tərəfdaşlıq Xartiyasının imzalanmasından sonra Azərbaycan-ABŞ tərəfdaşlığının artdığı bir vaxtda baş tutub.

Bildirilib ki, tərəflər əlaqələr, enerji, ticarət və investisiyalar da daxil olmaqla əməkdaşlığın daha da gücləndirilməsini gözləyirlər.

İranın xarici işlər naziri Abbas Əraqçi azərbaycanlı həmkarı Ceyhun Bayramovla görüşüb.

Gundemxeber.org xəbər verir ki, A. Əraqçi bu barədə özünün "Telegram" kanalında məlumat yayıb.

Görüş Birləşmiş Millətlər Təşkilatı (BMT) Baş Assambleyasının 81-ci sessiyası çərçivəsində baş tutub. Təfərrüatlar açıqlanmayıb.

Xəbər verdiyimiz kimi, bu gün Prezident İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirə keçirilib.

Gundemxeber.org Prezidentin çıxışından yaddaqalan hissələri təqdim edir: